ਸਹਿਜੜਾ ਦੇ ਸਰਕਾਰੀ ਸਕੂਲ ਵਿੱਚ ਮੁੱਖ ਅਧਿਆਪਕ ਉੱਤੇ ਲੱਗੇ ਵਿੱਤੀ ਦੋਸ਼ਾਂ ਤੇ ਜਾਂਚ ਦਾ ਸ਼ੁਰੂ ਹੋਣਾ ਇੱਕ ਵੱਡਾ ਕਦਮ ਹੈ।

ਗ੍ਰਾਮ ਪੰਚਾਇਤ ਅਤੇ ਸਕੂਲ ਮੈਨੇਜਮੈਂਟ ਕਮੇਟੀ ਵੱਲੋ ਕੀਤੀ ਗਈ ਸੀ ਸ਼ਿਕਾਇਤ, ਜਾਂਚ ਕਰਕੇ ਕਾਰਵਾਈ ਦੀ ਮੰਗ

ਬਰਨਾਲਾ ਬਿਊਰੋ 11 ਅਪ੍ਰੈਲ

            ਹਲਕੇ ਦੇ ਪਿੰਡ ਸਹਿਜੜਾ ਦੇ ਸਰਕਾਰੀ ਹਾਈ ਸਕੂਲ ਦੇ ਮੁੱਖ ਅਧਿਆਪਕ ਉਪਰ ਲੱਗੇ ਘਪਲੇ ਦੇ ਵੱਡੇ ਦੋਸ਼ ਤੋਂ ਬਾਅਦ ਇਸਦੀ ਜਾਂਚ ਸ਼ੁਰੂ ਹੋ ਗਈ ਹੈ। ਸਕੂਲ ਮੁਖੀ ਉਪਰ ਪਿੰਡ ਦੀ ਪੰਚਾਇਤ ਅਤੇ ਸਕੂਲ ਪ੍ਰਬੰਧਕ ਕਮੇਟੀ ਨੇ ਦੋਸ਼ ਲਗਾਏ ਹਨ ਅਤੇ ਇਸਦੀ ਲਿਖ਼ਤੀ ਸ਼ਿਕਾਇਤ ਕਰੀਬ 15 ਦਿਨ ਪਹਿਲਾਂ ਸੀਐਮ ਸਮੇਤ ਸਿੱਖਿਆ ਮੰਤਰੀ, ਐਮਪੀ, ਵਿਜੀਲੈਂਸ ਅਤੇ ਡੀਸੀ ਬਰਨਾਲਾ ਨੂੰ ਕੀਤੀ ਗਈ ਸੀ। ਜਿਸਤੋਂ ਬਾਅਦ ਸਿੱਖਿਆ ਵਿਭਾਗ ਦੀ ਇੱਕ ਟੀਮ ਮਾਮਲੇ ਦੀ ਜਾਂਚ ਕਰਨ ਸਕੂਲ ਦੇ ਵਿਹੜੇ ਪਹੁੰਚੀ।

ਸ਼ਿਕਾਇਤ ਪੱਤਰ ਵਿੱਚ ਪਿੰਡ ਵਾਸੀਆਂ ਨੇ ਦੋਸ਼ ਲਗਾਇਆ ਹੈ ਕਿ ਸਕੂਲ ਮੁਖੀ ਨੇ ਐਨਐਸਕਿਊਐਫ਼ ਲੈਬ ਦੀ ਉਸਾਰੀ ਅਤੇ ਰੰਗ ਰੋਗਨ ਦਾ ਸਮਾਨ ਖ਼ਰੀਦਣ ਸਬੰਧੀ ਕੋਈ ਖ਼ਰਚਾ ਕਮੇਟੀ ਨਹੀਂ ਬਣਾਈ ਅਤੇ ਖ਼ਰੀਦਿਆ ਗਿਆ ਰੰਗ ਵੀ ਘਟੀਆ ਕੁਆਲਿਟੀ ਦਾ ਹੈ। ਉਪਰੋਕਤ ਲੈਬ ਦੇ ਲੈਂਟਰ ਪਾਉਣ ਤੋਂ ਪਹਿਲਾਂ ਹੀ 85 ਫ਼ੀਸਦੀ ਗ੍ਰਾਂਟ ਖ਼ਰਚਣ ਦਾ ਵੀ ਦੋਸ਼ ਹੈ। ਪਿੰਡ ਵਾਸੀਆਂ ਨੇ ਇਸ ਵਿੱਚ ਘਪਲੇ ਦਾ ਖ਼ਦਸ਼ਾ ਜ਼ਾਹਰ ਕੀਤਾ ਹੈ। ਇਸਤੋਂ ਬਿਨ੍ਹਾਂ ਸ਼ਿਕਾਇਤ ਪੱਤਰ ਵਿੱਚ ਸਕੂਲ ਮੁਖੀ ਦੇ ਜ਼ਿਲ੍ਹਾ ਸਮਾਰਟ ਮੈਂਟਰ (ਡੀਐਸਐਮ) ਹੋਣ ਦੇ ਚੱਲਦਿਆਂ ਕੁੱਝ ਖਾਸ ਸਕੂਲਾਂ ਨੂੰ ਵੱਧ ਗ੍ਰਾਂਟਾਂ ਦੇਣ ਅਤੇ ਘਪਲੇ ਦਾ ਦੋਸ਼ ਲਗਾਉਂਦਿਆਂ ਇਸਦੀ ਜਾਂਚ ਵੀ ਮੰਗ ਹੈ।

ਪਿੰਡ ਦੇ ਸਰਪੰਚ ਬਲਵਿੰਦਰ ਸਿੰਘ ਨੇ ਕਿਹਾ ਕਿ ਉਪਰੋਕਤ ਸਕੂਲ ਮੁਖੀ ਅਧੀਨ ਸਹਿਜੜਾ ਸਕੂਲ ਸਮੇਤ ਹੁਣ ਤੱਕ ਹੋਏ ਸਾਰੇ ਕੰਮਾਂ ਦੀ ਨਿਰਪੱਖ ਜਾਂਚ ਦੀ ਮੰਗ ਹੋਣੀ ਚਾਹੀਦੀ ਹੈ।

ਉਧਰ ਸਕੂਲ ਮੁਖੀ ਰਾਜੇਸ਼ ਕੁਮਾਰ ਨੇ ਆਪਣੇ ਉਪਰ ਲੱਗੇ ਦੋਸ਼ਾਂ ਨੂੰ ਨਕਾਰਦਿਆਂ ਕਿਹਾ ਕਿ ਨਿਯਮਾਂ ਅਨੁਸਾਰ ਹੀ ਆਈ ਗ੍ਰਾਂਟ ਨੂੰ ਸਕੂਲ ਦਾ ਕਮਰਾ ਬਣਾਉਣ ਲਈ ਖਰਚਿਆ ਹੈ। ਜਿਸ ਰੰਗ ਨੂੰ ਲੈ ਕੇ ਇਤਰਾਜ਼ ਹੋਇਆ ਸੀ ਉਹ ਬਦਲ ਕੇ ਹੋਰ ਕੰਪਨੀ ਦਾ ਰੰਗ ਕੀਤਾ ਜਾ ਰਿਹਾ ਹੈ। ਉਹਨਾਂ ਕਿਹਾ ਕਿ ਡੀਐਸਐਮ ਡਿਊਟੀ ਕਾਰਨ ਉਹ ਖ਼ੁਦ ਪ੍ਰੇਸ਼ਾਨ ਹਨ ਅਤੇ ਵਿਭਾਗ ਤੋਂ ਇਹ ਡਿਊਟੀ ਕਟਵਾ ਰਹੇ ਹਨ।

ਜ਼ਿਲ੍ਹਾ ਸਿੱਖਿਆ ਅਧਿਕਾਰੀ ਸੁਨੀਤਇੰਦਰ ਸਿੰਘ ਨੇ ਕਿਹਾ ਕਿ ਇਸ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ ਅਤੇ ਜੋ ਵੀ ਜਾਂਚ ਵਿੱਚ ਸਾਹਮਣੇ ਆਵੇਗਾ­ ਉਸ ਅਨੁਸਾਰ ਕਾਰਵਾਈ ਕੀਤੀ ਜਾਵੇਗੀ।

ਫ਼ੋਟੋ ਕੈਪਸ਼ਨ: 1 : ਸਰਕਾਰੀ ਹਾਈ ਸਕੂਲ ਸਹਿਜੜਾ ਦੀ ਬਾਹਰੀ ਝਲਕ।

ਹੋਰ ਤਾਜ਼ਾਂ ਖਬਰਾਂ ਲਈ ਕਲਿੱਕ ਕਰੋ। ਖੁੱਲੀਆਂ ਅੱਖਾਂ  ਮਾਮਲਾ ਗੜਬੜ : ਸਹਿਜੜਾ ਸਕੂਲ ਮੁਖੀ ਉਪਰ ਲੱਗੇ ਘਪਲੇ ਦੇ ਦੋਸ਼ਾਂ ਦੀ ਜਾਂਚ ਸ਼ੁਰੂ