ਰਾਸ਼ਟਰੀ ਖੇਡ ਪੁਰਸਕਾਰਾਂ ਦਾ ਐਲਾਨ: ਇਸ ਵਾਰ ਕਿਸੇ ਖਿਡਾਰੀ ਨੂੰ ਨਹੀਂ ਮਿਲਿਆ ‘ਖੇਲ ਰਤਨ’, 17 ਖਿਡਾਰੀਆਂ ਨੂੰ ਮਿਲੇਗਾ ਅਰਜੁਨ ਪੁਰਸਕਾਰ

ਬਰਨਾਲਾ ਬਿਊਰੋ

                  ਖੇਡ ਮੰਤਰਾਲੇ ਵੱਲੋਂ ਸਾਲ 2025 ਦੇ ਰਾਸ਼ਟਰੀ ਖੇਡ ਪੁਰਸਕਾਰਾਂ ਦਾ ਐਲਾਨ ਕਰ ਦਿੱਤਾ ਗਿਆ ਹੈ, ਜਿਸ ਵਿੱਚ ਇੱਕ ਵੱਡਾ ਫੇਰਬਦਲ ਦੇਖਣ ਨੂੰ ਮਿਲਿਆ ਹੈ। ਪਿਛਲੇ ਬਾਰ੍ਹਾਂ ਸਾਲਾਂ ਦੇ ਇਤਿਹਾਸ ਵਿੱਚ ਇਹ ਪਹਿਲੀ ਵਾਰ ਹੋਇਆ ਹੈ ਜਦੋਂ ਖੇਡਾਂ ਦੇ ਸਭ ਤੋਂ ਵੱਡੇ ਸਨਮਾਨ ‘ਖੇਲ ਰਤਨ’ ਲਈ ਕਿਸੇ ਵੀ ਖਿਡਾਰੀ ਦੀ ਚੋਣ ਨਹੀਂ ਕੀਤੀ ਗਈ। ਇਸ ਤੋਂ ਪਹਿਲਾਂ ਸਾਲ 2014 ਵਿੱਚ ਅਜਿਹਾ ਮੌਕਾ ਆਇਆ ਸੀ ਜਦੋਂ ਕਿਸੇ ਵੀ ਖਿਡਾਰੀ ਨੂੰ ਇਹ ਸਰਵਉੱਚ ਖੇਡ ਸਨਮਾਨ ਨਹੀਂ ਦਿੱਤਾ ਗਿਆ ਸੀ। ਇਸ ਵਾਰ ਵੱਖ-ਵੱਖ ਖੇਡਾਂ ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ ਕਰਨ ਵਾਲੇ ਸਤਾਰ੍ਹਾਂ ਉੱਘੇ ਖਿਡਾਰੀਆਂ ਨੂੰ ਅਰਜੁਨ ਪੁਰਸਕਾਰ ਲਈ ਚੁਣਿਆ ਗਿਆ ਹੈ। ਇਸ ਤੋਂ ਇਲਾਵਾ ਚੌਰਾਸੀ ਸਾਲਾ ਮਹਾਨ ਫੁੱਟਬਾਲ ਖਿਡਾਰੀ ਆਈ. ਅਰੂਮਨਯਗਮ ਨੂੰ ਅਰਜੁਨ ਪੁਰਸਕਾਰ ਦੀ ਲਾਈਫਟਾਈਮ ਅਚੀਵਮੈਂਟ ਸ਼੍ਰੇਣੀ ਵਿੱਚ ਸ਼ਾਮਲ ਕੀਤਾ ਗਿਆ ਹੈ। ਜ਼ਿਕਰਯੋਗ ਹੈ ਕਿ ਉਹ ਸਾਲ 1962 ਦੀਆਂ ਜਕਾਰਤਾ ਏਸ਼ੀਆਈ ਖੇਡਾਂ ਵਿੱਚ ਸੋਨ ਤਗਮਾ ਜਿੱਤਣ ਵਾਲੀ ਭਾਰਤੀ ਫੁੱਟਬਾਲ ਟੀਮ ਦੇ ਅਹਿਮ ਮੈਂਬਰ ਰਹੇ ਸਨ। ਇਸ ਸਾਲ ਅਰਜੁਨ ਪੁਰਸਕਾਰ ਪ੍ਰਾਪਤ ਕਰਨ ਵਾਲੇ ਖਿਡਾਰੀਆਂ ਵਿੱਚ ਅਥਲੈਟਿਕਸ ਖੇਤਰ ਤੋਂ ਤੇਜਸਵਿਨ ਸ਼ੰਕਰ, ਮੁਹੰਮਦ ਅਜਮਲ ਵੀ, ਅਤੇ ਪ੍ਰਿਯੰਕਾ ਗੋਸਵਾਮੀ ਸ਼ਾਮਲ ਹਨ, ਜਦਕਿ ਬੈਡਮਿੰਟਨ ਵਿੱਚੋਂ ਤ੍ਰੀਸਾ ਜੌਲੀ ਅਤੇ ਪੁਲੇਲਾ ਗਾਯਤਰੀ ਗੋਪੀਚੰਦ ਨੂੰ ਚੁਣਿਆ ਗਿਆ ਹੈ। ਮੁੱਕੇਬਾਜ਼ੀ ਵਿੱਚ ਨਰੇਂਦਰ, ਸ਼ਤਰੰਜ ਵਿੱਚ ਵਿਦਿਤ ਗੁਜਰਾਤੀ ਅਤੇ ਦਿਵਿਆ ਦੇਸ਼ਮੁਖ, ਬਾਧਿਰ ਸ਼ੂਟਿੰਗ ਵਿੱਚ ਧਨੁਸ਼ ਸ਼੍ਰੀਕਾਂਤ, ਹਾਕੀ ਵਿੱਚ ਲਾਲਰੇਮਸੀਆਮੀ ਅਤੇ ਰਾਜਕੁਮਾਰ ਪਾਲ, ਕਬੱਡੀ ਵਿੱਚ ਸੁਰਜੀਤ ਅਤੇ ਪੂਜਾ, ਪੈਰਾ ਸ਼ੂਟਿੰਗ ਵਿੱਚ ਰੁਦ੍ਰਾਂਸ਼ ਖੰਡੇਲਵਾਲ, ਪੈਰਾ ਅਥਲੈਟਿਕਸ ਵਿੱਚ ਏਕਤਾ ਭਿਆਨ, ਰੋਇੰਗ ਵਿੱਚ ਅਰਵਿੰਦ ਸਿੰਘ ਅਤੇ ਸ਼ੂਟਿੰਗ ਵਿੱਚ ਅਖਿਲ ਸ਼ਿਓਰਾਨ ਦੇ ਨਾਂ ਸ਼ਾਮਲ ਹਨ। ਅਰਜੁਨ ਪੁਰਸਕਾਰ ਉਨ੍ਹਾਂ ਖਿਡਾਰੀਆਂ ਨੂੰ ਦਿੱਤਾ ਜਾਂਦਾ ਹੈ ਜੋ ਪਿਛਲੇ ਚਾਰ ਸਾਲਾਂ ਦੌਰਾਨ ਅੰਤਰਰਾਸ਼ਟਰੀ ਪੱਧਰ ‘ਤੇ ਲਗਾਤਾਰ ਬਿਹਤਰੀਨ ਪ੍ਰਦਰਸ਼ਨ, ਵਧੀਆ ਅਗਵਾਈ, ਖੇਡ-ਭਾਵਨਾ ਅਤੇ ਅਨੁਸ਼ਾਸਨ ਦਾ ਮੁਜ਼ਾਹਰਾ ਕਰਦੇ ਹਨ। ਖੇਡਾਂ ਵਿੱਚ ਕੋਚਾਂ ਦੇ ਯੋਗਦਾਨ ਨੂੰ ਸਨਮਾਨਿਤ ਕਰਨ ਲਈ ਦਿੱਤੇ ਜਾਣ ਵਾਲੇ ਦ੍ਰੋਣਾਚਾਰਿਆ ਐਵਾਰਡ ਲਈ ਅਥਲੈਟਿਕਸ ਕੋਚ ਪਰਵੀਰ ਸਿੰਘ, ਬਾਕਸਿੰਗ ਕੋਚ ਛੋਟੇ ਲਾਲ ਯਾਦਵ ਅਤੇ ਸ਼ੂਟਿੰਗ ਕੋਚ ਨੇਹਾ ਨੰਦਕੁਮਾਰ ਚਵਾਨ ਦੀ ਚੋਣ ਕੀਤੀ ਗਈ ਹੈ। ਦ੍ਰੋਣਾਚਾਰਿਆ ਐਵਾਰਡ ਉਨ੍ਹਾਂ ਮਹਾਨ ਕੋਚਾਂ ਨੂੰ ਦਿੱਤਾ ਜਾਂਦਾ ਹੈ ਜੋ ਲਗਾਤਾਰ ਲਗਨ ਅਤੇ ਕਾਬਲੀਅਤ ਨਾਲ ਖਿਡਾਰੀਆਂ ਨੂੰ ਤਰਾਸ਼ ਕੇ ਅੰਤਰਰਾਸ਼ਟਰੀ ਮੰਚ ‘ਤੇ ਦੇਸ਼ ਦਾ ਨਾਂ ਰੋਸ਼ਨ ਕਰਨ ਵਿੱਚ ਮਦਦ ਕਰਦੇ ਹਨ।

ਹੇੋਰ ਤਾਜ਼ਾ ਖਬਰਾਂ ਲਈ ਕਲਿੱਕ ਕਰੋ।