ਭਾਰਤੀ ਗਰੈਂਡਮਾਸਟਰ ਪ੍ਰਗਨਾਨੰਦ ਨੇ ਲੇਵੋਨ ਅਰੋਨੀਅਨ ਵਿਰੁੱਧ ਬਾਜ਼ੀ ਖੇਡੀ ਡਰਾਅ, ਸਿੰਕਫੀਲਡ ਕੱਪ ‘ਚ ਸਾਂਝੇ ਤੌਰ ’ਤੇ ਦੂਜੇ ਸਥਾਨ ’ਤੇ ਕਾਇਮ

ਬਰਨਾਲਾ ਬਿਊਰੋ

                ਭਾਰਤੀ ਗਰੈਂਡਮਾਸਟਰ ਆਰ. ਪ੍ਰਗਨਾਨੰਦ ਨੇ ਗਰੈਂਡ ਚੈੱਸ ਟੂਰ ਦੇ ਤਹਿਤ ਖੇਡੇ ਜਾ ਰਹੇ ਵੱਕਾਰੀ ਸਿੰਕਫੀਲਡ ਕੱਪ ਦੇ ਛੇਵੇਂ ਦੌਰ ਵਿੱਚ ਅਮਰੀਕਾ ਦੇ ਮਜ਼ਬੂਤ ਗਰੈਂਡਮਾਸਟਰ ਲੇਵੋਨ ਅਰੋਨੀਅਨ ਵਿਰੁੱਧ ਆਪਣੀ ਬਾਜ਼ੀ ਡਰਾਅ ਖੇਡੀ ਹੈ। ਇਸ ਸ਼ਾਨਦਾਰ ਨਤੀਜੇ ਦੇ ਨਾਲ ਪ੍ਰਗਨਾਨੰਦ ਸਾਢੇ ਤਿੰਨ ਅੰਕਾਂ ਨਾਲ ਸਾਂਝੇ ਤੌਰ ’ਤੇ ਦੂਜੇ ਸਥਾਨ ’ਤੇ ਮਜ਼ਬੂਤੀ ਨਾਲ ਬਣਿਆ ਹੋਇਆ ਹੈ। ਟੂਰਨਾਮੈਂਟ ਵਿੱਚ ਹੁਣ ਖੇਡ ਦੇ ਸਿਰਫ਼ ਤਿੰਨ ਦੌਰ ਬਾਕੀ ਰਹਿੰਦੇ ਹਨ, ਜਿਸ ਨਾਲ ਮੁਕਾਬਲਾ ਹੋਰ ਵੀ ਰੋਮਾਂਚਕ ਮੋੜ ‘ਤੇ ਪਹੁੰਚ ਗਿਆ ਹੈ। ਫਿਲਹਾਲ ਅਮਰੀਕਾ ਦਾ ਵੈਸਲੀ ਸੋ ਚਾਰ ਅੰਕਾਂ ਨਾਲ ਤਾਲਿਕਾ ਵਿੱਚ ਸਭ ਤੋਂ ਉੱਪਰ ਪਹਿਲੇ ਸਥਾਨ ‘ਤੇ ਚੱਲ ਰਿਹਾ ਹੈ। ਇਸ ਟੂਰਨਾਮੈਂਟ ਦੇ ਛੇਵੇਂ ਦੌਰ ਵਿੱਚ ਖੇਡੇ ਗਏ ਪੰਜ ਮੁਕਾਬਲਿਆਂ ਵਿੱਚੋਂ ਸਿਰਫ਼ ਇੱਕ ਹੀ ਨਤੀਜਾ ਨਿਕਲ ਸਕਿਆ ਜਦਕਿ ਬਾਕੀ ਖੇਡਾਂ ਬਰਾਬਰੀ ‘ਤੇ ਸਮਾਪਤ ਹੋਈਆਂ। ਵੈਸਲੀ ਸੋ ਨੇ ਫ਼ਰਾਂਸ ਦੇ ਮੈਕਸਿਸ ਵਾਚੀਅਰ-ਲਾਗਰੇਵ ਨਾਲ ਅੰਕ ਵੰਡ ਕੇ ਆਪਣੇ ਅੰਕ ਵਧਾਏ। ਤਾਲਿਕਾ ਵਿੱਚ ਪ੍ਰਗਨਾਨੰਦ ਤੋਂ ਇਲਾਵਾ ਫ਼ਰਾਂਸ ਦੇ ਵਾਚੀਅਰ-ਲਾਗਰੇਵ ਅਤੇ ਜਰਮਨੀ ਦੇ ਵਿਨਸੈਂਟ ਕੀਮਰ ਵੀ ਸਾਢੇ ਤਿੰਨ-ਸਾਢੇ ਤਿੰਨ ਅੰਕਾਂ ਨਾਲ ਸਾਂਝੇ ਤੌਰ ‘ਤੇ ਦੂਜੇ ਸਥਾਨ ’ਤੇ ਬਿਰਾਜਮਾਨ ਹਨ। ਇਸ ਤੋਂ ਇਲਾਵਾ ਅਮਰੀਕਾ ਦੇ ਫੈਬੀਆਨੋ ਕਾਰੂਆਨਾ, ਸੇਵੀਅਨ ਸੈਮੂਅਲਸ ਅਤੇ ਲੇਵੋਨ ਅਰੋਨੀਅਨ ਤਿੰਨ-ਤਿੰਨ ਅੰਕ ਹਾਸਲ ਕਰਕੇ ਸਾਂਝੇ ਤੌਰ ’ਤੇ ਪੰਜਵੇਂ ਸਥਾਨ ’ਤੇ ਚੱਲ ਰਹੇ ਹਨ। ਨੀਦਰਲੈਂਡ ਦਾ ਅਨੀਸ਼ ਗਿਰੀ ਅਤੇ ਵਿਸ਼ਵ ਚੈਂਪੀਅਨਸ਼ਿਪ ਦਾ ਦਾਅਵੇਦਾਰ ਉਜ਼ਬੇਕਿਸਤਾਨ ਦਾ ਖਿਡਾਰੀ ਜਾਵੋਖਿਰ ਸਿੰਦਾਰੋਵ ਇਸ ਸੂਚੀ ਵਿੱਚ ਉਨ੍ਹਾਂ ਤੋਂ ਬਾਅਦ ਆਉਂਦੇ ਹਨ, ਜਦੋਂ ਕਿ ਨੀਦਰਲੈਂਡ ਦਾ ਜੋਰਡੇਨ ਵਾਨ ਫੋਰੈਸਟ ਮਹਿਜ਼ ਇੱਕ ਅੰਕ ਨਾਲ ਸਭ ਤੋਂ ਹੇਠਲੇ ਸਥਾਨ ’ਤੇ ਚੱਲ ਰਿਹਾ ਹੈ। ਲੇਵੋਨ ਅਰੋਨੀਅਨ ਵਿਰੁੱਧ ਆਪਣੇ ਮੈਚ ਦੌਰਾਨ ਪ੍ਰਗਨਾਨੰਦ ਨੇ ਖੇਡ ਦੀ ਸਥਿਤੀ ਨੂੰ ਪੇਚੀਦਾ ਬਣਾ ਕੇ ਜਿੱਤ ਵੱਲ ਵਧਣ ਦੀ ਭਰਪੂਰ ਕੋਸ਼ਿਸ਼ ਕੀਤੀ, ਪਰ ਆਰਮੇਨੀਆ ਦੇ ਇਸ ਸਾਬਕਾ ਖਿਡਾਰੀ ਨੇ ਬਹੁਤ ਹੀ ਸ਼ਾਨਦਾਰ ਬਚਾਅ ਖੇਡਦਿਆਂ ਮੈਚ ਨੂੰ ਡਰਾਅ ‘ਤੇ ਸਮਾਪਤ ਕਰਵਾ ਦਿੱਤਾ। ਦਿਨ ਦੀ ਇੱਕਮਾਤਰ ਫ਼ੈਸਲਾਕੁੰਨ ਬਾਜ਼ੀ ਅਨੀਸ਼ ਨੇ ਜਿੱਤੀ, ਜਿਸ ਨੇ ਆਪਣੀ ਬਹਿਤਰੀਨ ਖੇਡ ਦਾ ਪ੍ਰਦਰਸ਼ਨ ਕਰਦਿਆਂ ਆਪਣੇ ਹੀ ਹਮਵਤਨ ਖਿਡਾਰੀ ਵਾਨ ਫੋਰੈਸਟ ਵਿਰੁੱਧ ਧਮਾਕੇਦਾਰ ਜਿੱਤ ਹਾਸਲ ਕੀਤੀ। ਪ੍ਰਗਨਾਨੰਦ ਦੀ ਇਸ ਸ਼ਾਨਦਾਰ ਖੇਡ ਨਾਲ ਭਾਰਤੀ ਖੇਡ ਪ੍ਰੇਮੀਆਂ ਵਿੱਚ ਬਹੁਤ ਉਤਸ਼ਾਹ ਹੈ ਅਤੇ ਰਹਿੰਦੇ ਤਿੰਨ ਦੌਰਾਂ ਵਿੱਚ ਵੀ ਉਸ ਤੋਂ ਬਹਿਤਰੀਨ ਪ੍ਰਦਰਸ਼ਨ ਦੀ ਉਮੀਦ ਕੀਤੀ ਜਾ ਰਹੀ ਹੈ।

ਹੋਰ ਤਾਜ਼ਾ ਖਬਰਾਂ ਲਈ ਕਲਿੱਕ ਕਰੋ। ਖੁੱਲ੍ਹੀਆਂ ਅੱਖਾਂ   ਸਪੈਸ਼ਲ ਕੇਡਰ ਅਧਿਆਪਕਾਂ ਦਾ ਧਰਨਾ ਛੇਵੇਂ ਦਿਨ ਵੀ ਜਾਰੀ, ਹੱਲ ਨਾ ਨਿਕਲਣ ’ਤੇ 19 ਅਗਸਤ ਨੂੰ ਗੰਭੀਰਪੁਰੇ ਵਿਖੇ ਕੈਂਡਲ ਮਾਰਚ ਕੱਢਣ ਦਾ ਐਲਾਨ