ਸਪੇਨ ਨੇ ਆਸਟਰੀਆ ਨੂੰ 3-0 ਨਾਲ ਹਰਾ ਕੇ 16 ਸਾਲਾਂ ਬਾਅਦ ਵਿਸ਼ਵ ਕੱਪ ਦੇ ਰਾਊਂਡ ਆਫ 16 ’ਚ ਬਣਾਈ ਜਗ੍ਹਾ

ਕੇਂਦਰੀ ਬਿਊਰੋ:

ਲਾਸ ਏਂਜਲਸ ਵਿਖੇ ਖੇਡੇ ਗਏ ਇੱਕ ਬੇਹਤਰੀਨ ਮੁਕਾਬਲੇ ਵਿੱਚ ਸਪੇਨ ਨੇ ਗਰੁੱਪ ‘ਜੇ’ ਦੇ ਉਪ ਜੇਤੂ ਆਸਟਰੀਆ ਨੂੰ ਰਾਉਂਡ ਆਫ਼ 32 ਦੇ ਮੈਚ ਵਿੱਚ 3-0 ਦੀ ਸ਼ਾਨਦਾਰ ਨਾਕਆਊਟ ਜਿੱਤ ਦਰਜ ਕਰਕੇ ਰਾਊਂਡ ਆਫ 16 ਵਿੱਚ ਪ੍ਰਵੇਸ਼ ਕਰ ਲਿਆ ਹੈ। ਗਰੁੱਪ ਐੱਚ ਵਿੱਚ ਸਿਖਰ ’ਤੇ ਰਹਿਣ ਤੋਂ ਬਾਅਦ ਮੈਦਾਨ ਵਿੱਚ ਉੱਤਰੀ ਸਪੇਨ ਦੀ ਟੀਮ ਨੇ ਸ਼ਾਨਦਾਰ ਸ਼ੁਰੂਆਤ ਕਰਦੇ ਹੋਏ ਬੇਹੱਦ ਹਮਲਾਵਰ ਖੇਡ ਦਿਖਾਈ ਅਤੇ ਮੈਚ ਦੇ ਪਹਿਲੇ ਅੱਧ ਤੋਂ ਹੀ ਆਸਟਰੀਆ ’ਤੇ ਲਗਾਤਾਰ ਦਬਾਅ ਬਣਾ ਕੇ ਰੱਖਿਆ। ਹਾਲਾਂਕਿ ਇਸ ਦੌਰਾਨ ਸਪੇਨੀ ਖਿਡਾਰੀਆਂ ਨੇ ਗੋਲ ਕਰਨ ਦੇ ਕਈ ਸ਼ਾਨਦਾਰ ਮੌਕੇ ਬਣਾਏ ਪਰ ਸ਼ੁਰੂਆਤ ਵਿੱਚ ਉਹ ਉਨ੍ਹਾਂ ਮੌਕਿਆਂ ਨੂੰ ਸਫ਼ਲ ਨਤੀਜੇ ਵਿੱਚ ਬਦਲਣ ਵਿੱਚ ਅਸਫ਼ਲ ਰਹੇ। ਮੈਚ ਦੇ ਪਹਿਲੇ ਦੋ ਮਿੰਟਾਂ ਵਿੱਚ ਹੀ ਸਪੇਨ ਦੇ ਲਾਮਿਨ ਯਾਮਲ ਨੇ ਵਿਰੋਧੀ ਟੀਮ ’ਤੇ ਦਬਾਅ ਬਣਾਉਣ ਦੀ ਭਰਪੂਰ ਕੋਸ਼ਿਸ਼ ਕੀਤੀ ਸੀ, ਜਿਸ ਤੋਂ ਬਾਅਦ 29ਵੇਂ ਮਿੰਟ ਵਿੱਚ ਸਪੇਨ ਵੱਲੋਂ ਪਹਿਲਾ ਗੋਲ ਵੀ ਕੀਤਾ ਗਿਆ, ਪਰ ਮਾਰਕ ਕੁਕੁਰੇਲਾ ਵੱਲੋਂ ਕੀਤੇ ਗਏ ਇਸ ਗੋਲ ਨੂੰ ਰੈਫਰੀ ਗਲੇਨ ਨਾਈਬਰਗ ਨੇ ਆਫ਼ ਸਾਈਡ ਕਰਾਰ ਦਿੰਦੇ ਹੋਏ ਰੱਦ ਕਰ ਦਿੱਤਾ। ਇਸ ਦੇ ਬਾਵਜੂਦ ਸਪੇਨ ਨੇ ਹਿੰਮਤ ਨਹੀਂ ਹਾਰੀ ਅਤੇ ਆਪਣੇ ਹਮਲਿਆਂ ਨੂੰ ਲਗਾਤਾਰ ਵਧਾਇਆ ਜਿਸਦਾ ਫਾਇਦਾ ਉਨ੍ਹਾਂ ਨੂੰ 36ਵੇਂ ਮਿੰਟ ਵਿੱਚ ਮਿਲਿਆ ਜਦੋਂ ਮਿਕੇਲ ਓਯਰਜ਼ਾਬਾਲ ਨੇ ਇੱਕ ਬੇਹਤਰੀਨ ਗੋਲ ਕਰਦੇ ਹੋਏ ਸਪੇਨ ਨੂੰ 1-0 ਦੀ ਲੀਡ ਦਿਵਾ ਦਿੱਤੀ ਅਤੇ ਪਹਿਲਾ ਅੱਧ ਇਸੇ ਸਕੋਰ ਨਾਲ ਖ਼ਤਮ ਹੋਇਆ। ਦੂਜੇ ਅੱਧ ਵਿੱਚ ਸਪੇਨ ਆਪਣੀ ਇਸ ਲੀਡ ਨੂੰ ਬਰਕਰਾਰ ਰੱਖਣ ਅਤੇ ਹੋਰ ਵਧਾਉਣ ਦੀ ਇੱਛਾ ਨਾਲ ਮੈਦਾਨ ’ਤੇ ਉਤਰਿਆ, ਜਦਕਿ ਦੂਜੇ ਪਾਸੇ ਆਸਟ੍ਰੇਲੀਆ ਨੇ ਸਾਲ 1954 ਤੋਂ ਬਾਅਦ ਆਪਣਾ ਪਹਿਲਾ ਨਾਕਆਊਟ ਮੈਚ ਖੇਡਦੇ ਹੋਏ ਇਤਿਹਾਸ ਰਚਣ ਦੀ ਉਮੀਦ ਨਾਲ ਜ਼ੋਰਦਾਰ ਵਾਪਸੀ ਦੀ ਕੋਸ਼ਿਸ਼ ਕੀਤੀ, ਪਰ ਇਹ ਅੱਧ ਵੀ ਉਨ੍ਹਾਂ ਦੇ ਹੱਕ ਵਿੱਚ ਨਹੀਂ ਰਿਹਾ ਅਤੇ ਸਪੇਨ ਦਾ ਪਾਸਾ ਪੂਰੀ ਤਰ੍ਹਾਂ ਭਾਰੀ ਦਿਖਾਈ ਦਿੱਤਾ। ਮੈਚ ਦੇ 66ਵੇਂ ਮਿੰਟ ਵਿੱਚ ਪੇਡਰੋ ਪੋਰੋ ਨੇ ਇੱਕ ਸ਼ਾਨਦਾਰ ਹੈਡਰ ਰਾਹੀਂ ਗੇਂਦ ਨੂੰ ਜਾਲ ਵਿੱਚ ਪਹੁੰਚਾ ਕੇ ਸਪੇਨ ਦੀ ਲੀਡ ਨੂੰ 2-0 ਕਰ ਦਿੱਤਾ, ਜਿਸ ਤੋਂ ਬਾਅਦ ਆਸਟਰੀਆ ਦੀਆਂ ਵਾਪਸੀ ਦੀਆਂ ਉਮੀਦਾਂ ਲਗਭਗ ਖ਼ਤਮ ਹੋ ਗਈਆਂ। ਰਹੀ-ਸਹੀ ਕਸਰ 89ਵੇਂ ਮਿੰਟ ਵਿੱਚ ਮਿਕੇਲ ਓਯਰਜ਼ਾਬਾਲ ਨੇ ਆਪਣਾ ਦੂਜਾ ਅਤੇ ਟੀਮ ਲਈ ਤੀਜਾ ਗੋਲ ਕਰਕੇ ਪੂਰੀ ਕਰ ਦਿੱਤੀ ਅਤੇ ਸਪੇਨ ਦੀ ਸ਼ਾਨਦਾਰ ਜਿੱਤ ’ਤੇ ਪੱਕੀ ਮੋਹਰ ਲਗਾ ਦਿੱਤੀ। ਸਾਲ 2010 ਦੀ ਵਿਸ਼ਵ ਕੱਪ ਜੇਤੂ ਸਪੇਨ ਦੀ ਟੀਮ ਹਾਲਾਂਕਿ ਪਿਛਲੇ ਕੁਝ ਸਾਲਾਂ ਵਿੱਚ ਉਮੀਦਾਂ ’ਤੇ ਖਰੀ ਨਹੀਂ ਉਤਰ ਸਕੀ ਸੀ, ਜਿੱਥੇ 2014 ਵਿੱਚ ਟੀਮ ਗਰੁੱਪ ਪੜਾਅ ਵਿੱਚ ਹੀ ਬਾਹਰ ਹੋ ਗਈ ਸੀ ਅਤੇ 2018 ਤੇ 2022 ਵਿੱਚ ਇਹ ਪੈਨਲਟੀ ਸ਼ੂਟਆਊਟ ਰਾਹੀਂ ਬਾਹਰ ਹੋਈ ਸੀ, ਪਰ ਇਸ ਵਾਰ ਕੋਚ ਲੁਈਸ ਡੇ ਲਾ ਫੁਏਂਤੇ ਦੀ ਅਗਵਾਈ ਵਿੱਚ ਟੀਮ ਖਿਤਾਬ ਦੀ ਮਜ਼ਬੂਤ ਦਾਅਵੇਦਾਰ ਦਿਖ ਰਹੀ ਹੈ। ਆਸਟ੍ਰੇਲੀਆ ਵਿਰੁੱਧ ਸਪੇਨ ਦਾ ਰਿਕਾਰਡ ਪਹਿਲਾਂ ਹੀ ਬਹੁਤ ਸ਼ਾਨਦਾਰ ਰਿਹਾ ਹੈ ਅਤੇ ਉਹ ਪਿਛਲੇ ਪੰਜ ਮੈਚਾਂ ਵਿੱਚ ਵੀ ਉਸ ਤੋਂ ਨਹੀਂ ਹਾਰੀ ਸੀ, ਜਦਕਿ ਆਸਟਰੀਆ ਨੇ ਆਖਰੀ ਵਾਰ 1990 ਵਿੱਚ ਇੱਕ ਦੋਸਤਾਨਾ ਮੈਚ ਵਿੱਚ ਸਪੇਨ ਨੂੰ 3-2 ਨਾਲ ਹਰਾਇਆ ਸੀ। ਅੱਜ ਦੇ ਮੈਚ ਵਿੱਚ ਸਪੇਨ ਲਈ ਸਭ ਤੋਂ ਵੱਡੀ ਖ਼ੁਸ਼ੀ ਦੀ ਗੱਲ ਇਹ ਰਹੀ ਕਿ ਨੌਜਵਾਨ ਸਟਾਰ ਲਾਮਿਨ ਯਾਮਲ ਪੂਰੀ ਤਰ੍ਹਾਂ ਫਿੱਟ ਰਹਿ ਕੇ ਪੂਰੇ ਮੈਚ ਲਈ ਉਪਲਬਧ ਰਹੇ, ਜਦਕਿ ਸੱਟਾਂ ਤੋਂ ਉੱਭਰ ਕੇ ਵਾਪਸੀ ਕਰਨ ਵਾਲੇ ਯੇਰੇਮੀ ਪਿਨੋ ਅਤੇ ਵਿਕਟਰ ਮੁਨੋਜ਼ ਨੇ ਵੀ ਟੀਮ ਨੂੰ ਮਜ਼ਬੂਤੀ ਪ੍ਰਦਾਨ ਕੀਤੀ।

ਹੋਰ ਤਾਜ਼ਾ ਖਬਰਾਂ ਲਈ ਖੁੱਲੀਆਂ ਅੱਖਾਂ ਤੇ ਕਲਿੱਕ ਕਰੋ।