ਕ੍ਰੈਡਿਟ ਕਾਰਡ ਬੰਦ ਕਰਨ ਵਿੱਚ ਦੇਰੀ ਪਵੇਗੀ ਮਹਿੰਗੀ, ਬੈਂਕਾਂ ਨੂੰ ਗਾਹਕਾਂ ਨੂੰ ਦੇਣਾ ਪਵੇਗਾ ਹਰਜਾਨਾ

ਬਰਨਾਲਾ ਬਿਊਰੋ

               ਭਾਰਤੀ ਰਿਜ਼ਰਵ ਬੈਂਕ ਵੱਲੋਂ ਗਾਹਕਾਂ ਦੇ ਹਿੱਤਾਂ ਦੀ ਰਾਖੀ ਲਈ ਅਤੇ ਬੈਂਕਾਂ ਦੀ ਮਨਮਾਨੀ ‘ਤੇ ਠੱਲ੍ਹ ਪਾਉਣ ਲਈ ਇੱਕ ਬਹੁਤ ਹੀ ਮਹੱਤਵਪੂਰਨ ਅਤੇ ਸਖ਼ਤ ਨਿਯਮ ਲਾਗੂ ਕੀਤਾ ਗਿਆ ਹੈ। ਅਕਸਰ ਇਹ ਦੇਖਣ ਵਿੱਚ ਆਉਂਦਾ ਹੈ ਕਿ ਜਦੋਂ ਕੋਈ ਨਵਾਂ ਕ੍ਰੈਡਿਟ ਕਾਰਡ ਜਾਰੀ ਕਰਨਾ ਹੁੰਦਾ ਹੈ ਤਾਂ ਬੈਂਕਾਂ ਦੇ ਨੁਮਾਇੰਦੇ ਗਾਹਕਾਂ ਨੂੰ ਵਾਰ-ਵਾਰ ਫ਼ੋਨ ਕਰਦੇ ਹਨ, ਪਰ ਜਦੋਂ ਗਾਹਕ ਆਪਣਾ ਕ੍ਰੈਡਿਟ ਕਾਰਡ ਬੰਦ ਕਰਵਾਉਣਾ ਚਾਹੁੰਦਾ ਹੈ ਤਾਂ ਬੈਂਕ ਅਧਿਕਾਰੀ ਆਨਾਕਾਨੀ ਕਰਦੇ ਹਨ ਅਤੇ ਕਈ-ਕਈ ਹਫ਼ਤਿਆਂ ਤੱਕ ਮਾਮਲੇ ਨੂੰ ਲਟਕਾ ਕੇ ਰੱਖਦੇ ਹਨ। ਗਾਹਕਾਂ ਦੀ ਇਸੇ ਪਰੇਸ਼ਾਨੀ ਨੂੰ ਖ਼ਤਮ ਕਰਨ ਲਈ ਭਾਰਤੀ ਰਿਜ਼ਰਵ ਬੈਂਕ ਦੀਆਂ ਨਵੀਆਂ ਹਦਾਇਤਾਂ ਮੁਤਾਬਕ ਬੈਂਕਾਂ ਲਈ ਇਹ ਲਾਜ਼ਮੀ ਕੀਤਾ ਗਿਆ ਹੈ ਕਿ ਉਹ ਗਾਹਕ ਵੱਲੋਂ ਦਿੱਤੀ ਗਈ ਬੇਨਤੀ ‘ਤੇ ਸੱਤ ਕਾਰਜ ਦਿਨਾਂ ਦੇ ਅੰਦਰ-ਅੰਦਰ ਕਾਰਡ ਬੰਦ ਕਰਨ ਦੀ ਪ੍ਰਕਿਰਿਆ ਪੂਰੀ ਕਰਨ। ਜੇਕਰ ਬੈਂਕ ਨਿਰਧਾਰਤ ਸਮੇਂ ਵਿੱਚ ਕਾਰਡ ਬੰਦ ਕਰਨ ਵਿੱਚ ਅਸਫ਼ਲ ਰਹਿੰਦਾ ਹੈ, ਤਾਂ ਉਸ ਨੂੰ ਗਾਹਕ ਨੂੰ ਹਰ ਦਿਨ ਦੇ ਹਿਸਾਬ ਨਾਲ ਪੰਜ ਸੌ ਰੁਪਏ ਦਾ ਭਾਰੀ ਜੁਰਮਾਨਾ ਦੇਣਾ ਪਵੇਗਾ। ਭਾਰਤੀ ਰਿਜ਼ਰਵ ਬੈਂਕ ਦੇ ਨਿਰਦੇਸ਼ਾਂ ਅਨੁਸਾਰ ਜਿਵੇਂ ਹੀ ਗਾਹਕ ਆਪਣਾ ਕ੍ਰੈਡਿਟ ਕਾਰਡ ਬੰਦ ਕਰਨ ਲਈ ਰਸਮੀ ਬੇਨਤੀ ਦਰਜ ਕਰਵਾਉਂਦਾ ਹੈ, ਬੈਂਕ ਜਾਂ ਕਾਰਡ ਜਾਰੀ ਕਰਨ ਵਾਲੀ ਸੰਸਥਾ ਲਈ ਸੱਤ ਕਾਰਜ ਦਿਨਾਂ ਦੇ ਅੰਦਰ ਉਸ ਨੂੰ ਬੰਦ ਕਰਨਾ ਜ਼ਰੂਰੀ ਹੋਵੇਗਾ। ਕਾਰਡ ਬੰਦ ਕਰਨ ਤੋਂ ਬਾਅਦ ਬੈਂਕ ਵੱਲੋਂ ਗਾਹਕ ਨੂੰ ਮੋਬਾਈਲ ਸੰਦੇਸ਼ ਜਾਂ ਈਮੇਲ ਰਾਹੀਂ ਇਸ ਦੀ ਲਿਖਤੀ ਪੁਸ਼ਟੀ ਵੀ ਭੇਜਣੀ ਪਵੇਗੀ। ਜੇਕਰ ਬੈਂਕ ਸੱਤ ਦਿਨਾਂ ਵਿੱਚ ਇਹ ਕੰਮ ਨਹੀਂ ਕਰਦਾ ਤਾਂ ਅੱਠਵੇਂ ਦਿਨ ਤੋਂ ਹਰਜਾਨੇ ਦਾ ਹਿਸਾਬ ਸ਼ੁਰੂ ਹੋ ਜਾਵੇਗਾ। ਉਦਾਹਰਨ ਵਜੋਂ ਜੇਕਰ ਕਿਸੇ ਗਾਹਕ ਨੇ ਆਪਣੇ ਸਾਰੇ ਬਿੱਲਾਂ ਦਾ ਭੁਗਤਾਨ ਕਰਕੇ ਮਹੀਨੇ ਦੀ ਪਹਿਲੀ ਤਾਰੀਖ਼ ਨੂੰ ਬੇਨਤੀ ਦਿੱਤੀ ਹੈ ਅਤੇ ਬੈਂਕ ਨੇ ਸੱਤ ਤਾਰੀਖ਼ ਤੱਕ ਕਾਰਡ ਬੰਦ ਕਰਨ ਦੀ ਬਜਾਏ ਬਾਰ੍ਹਾਂ ਤਾਰੀਖ਼ ਨੂੰ ਕਾਰਡ ਬੰਦ ਕੀਤਾ, ਤਾਂ ਪੰਜ ਦਿਨ ਦੀ ਦੇਰੀ ਦੇ ਹਿਸਾਬ ਨਾਲ ਬੈਂਕ ਨੂੰ ਗਾਹਕ ਨੂੰ ਪੰਚੀ ਸੌ ਰੁਪਏ ਹਰਜਾਨੇ ਵਜੋਂ ਦੇਣੇ ਪੈਣਗੇ। ਇਸ ਨਿਯਮ ਦਾ ਲਾਭ ਲੈਣ ਲਈ ਗਾਹਕਾਂ ਨੂੰ ਵੀ ਦੋ ਮੁੱਖ ਸ਼ਰਤਾਂ ਦਾ ਧਿਆਨ ਰੱਖਣਾ ਹੋਵੇਗਾ। ਪਹਿਲੀ ਸ਼ਰਤ ਇਹ ਹੈ ਕਿ ਕਾਰਡ ਬੰਦ ਕਰਨ ਦੀ ਬੇਨਤੀ ਕਰਦੇ ਸਮੇਂ ਕਾਰਡ ‘ਤੇ ਕੋਈ ਵੀ ਬਕਾਇਆ ਬਿੱਲ, ਮਹੀਨਾਵਾਰ ਕਿਸ਼ਤ ਜਾਂ ਵਿਆਜ ਬਾਕੀ ਨਹੀਂ ਹੋਣਾ ਚਾਹੀਦਾ। ਬਕਾਇਆ ਰਕਮ ਸਿਫ਼ਰ ਹੋਣ ਦੀ ਸਥਿਤੀ ਵਿੱਚ ਹੀ ਇਹ ਨਿਯਮ ਲਾਗੂ ਮੰਨਿਆ ਜਾਵੇਗਾ। ਦੂਜੀ ਸ਼ਰਤ ਇਹ ਹੈ ਕਿ ਗਾਹਕ ਕੋਲ ਆਪਣੀ ਬੇਨਤੀ ਦਾ ਪੂਰਾ ਸਬੂਤ ਜਿਵੇਂ ਕਿ ਬੇਨਤੀ ਨੰਬਰ ਜਾਂ ਈਮੇਲ ਦਾ ਸਬੂਤ ਸੁਰੱਖਿਅਤ ਹੋਣਾ ਚਾਹੀਦਾ ਹੈ। ਜੇਕਰ ਬੈਂਕ ਦੇਰੀ ਕਰਨ ਦੇ ਬਾਵਜੂਦ ਗਾਹਕ ਨੂੰ ਹਰਜਾਨਾ ਦੇਣ ਤੋਂ ਇਨਕਾਰ ਕਰਦਾ ਹੈ, ਤਾਂ ਗਾਹਕ ਬਿਨਾਂ ਕਿਸੇ ਖ਼ਰਚੇ ਦੇ ਭਾਰਤੀ ਰਿਜ਼ਰਵ ਬੈਂਕ ਦੇ ਬੈਂਕਿੰਗ ਲੋਕਪਾਲ ਪੋਰਟਲ ‘ਤੇ ਜਾ ਕੇ ਸਿੱਧੇ ਤੌਰ ‘ਤੇ ਆਨਲਾਈਨ ਸ਼ਿਕਾਇਤ ਦਰਜ ਕਰਵਾ ਸਕਦਾ ਹੈ, ਜਿੱਥੇ ਅਜਿਹੀਆਂ ਲਾਪਰਵਾਹੀਆਂ ਲਈ ਬੈਂਕਾਂ ਵਿਰੁੱਧ ਸਖ਼ਤ ਕਾਰਵਾਈ ਕੀਤੀ ਜਾਂਦੀ ਹੈ।

ਹੋਰ ਤਾਜ਼ਾ ਖਬਰਾਂ ਲਈ ਕਲਿੱਕ ਕਰੋ। ਖੁੱਲ੍ਹੀਆਂ ਅੱਖਾਂਂ ਸ਼੍ਰੀ ਕ੍ਰਿਸ਼ਨ ਜਨਮ ਅਸ਼ਟਮੀ ਦੀ ਤਰੀਕ, ਪੂਜਾ ਦਾ ਸ਼ੁਭ ਸਮਾਂ ਅਤੇ ਪਰਾਣ ਦਾ ਮਹੱਤਵ: ਜਾਣੋ ਭਗਵਾਨ ਕ੍ਰਿਸ਼ਨ ਦੇ ਅਵਤਾਰ ਦੀ ਪਵਿੱਤਰ ਕਹਾਣੀ