ਭਦੌੜ ਦੇ ਪੁਰਾਤਨ ਸ਼ਿਵ ਮੰਦਰਾਂ ਵਿੱਚ ਧੂਮਧਾਮ ਨਾਲ ਮਨਾਈ ਸਾਉਣ ਮਹੀਨੇ ਦੀ ਮਹਾਂ ਸ਼ਿਵਰਾਤਰੀ, ਕਾਵੜੀਆਂ ਨੇ ਹਰਿਦੁਆਰ ਤੋਂ ਲਿਆਂਦਾ ਪਵਿੱਤਰ ਗੰਗਾ ਜਲ ਸ਼ਿਵਲਿੰਗ ’ਤੇ ਕੀਤਾ ਅਰਪਿਤ

ਬਰਨਾਲਾ ਬਿਊਰੋ

                 ਇਤਿਹਾਸਕ ਸ਼ਹਿਰ ਭਦੌੜ ਦੇ ਵੱਖ-ਵੱਖ ਪੁਰਾਤਨ ਅਤੇ ਪ੍ਰਸਿੱਧ ਸ਼ਿਵ ਮੰਦਰਾਂ ਵਿੱਚ ਸਾਉਣ ਮਹੀਨੇ ਦੀ ਮਹਾਂ ਸ਼ਿਵਰਾਤਰੀ ਦਾ ਪਵਿੱਤਰ ਅਤੇ ਉਤਸ਼ਾਹਪੂਰਨ ਦਿਹਾੜਾ ਅਤਿਅੰਤ ਸ਼ਰਧਾ, ਭਗਤੀ ਅਤੇ ਧੂਮਧਾਮ ਨਾਲ ਮਨਾਇਆ ਗਿਆ। ਇਸ ਪਵਿੱਤਰ ਮੌਕੇ ‘ਤੇ ਤੜਕੇ ਸਵੇਰ ਤੋਂ ਹੀ ਮੰਦਰਾਂ ਦੇ ਵਿਹੜੇ ਵਿੱਚ ਭਗਤ ਜਨਾਂ ਦੀਆਂ ਲੰਮੀਆਂ-ਲੰਮੀਆਂ ਕਤਾਰਾਂ ਲੱਗਣੀਆਂ ਸ਼ੁਰੂ ਹੋ ਗਈਆਂ ਸਨ ਅਤੇ ਸ਼ਰਧਾਲੂਆਂ ਵੱਲੋਂ ਭਗਵਾਨ ਭੋਲੇਨਾਥ ਦੀ ਵਿਧੀ-ਵਿਧਾਨ ਨਾਲ ਪੂਜਾ ਅਰਚਨਾ ਕਰਦਿਆਂ ਪਵਿੱਤਰ ਸ਼ਿਵਲਿੰਗ ’ਤੇ ਦੁੱਧ, ਦਹੀਂ, ਸ਼ਹਿਦ, ਫੁੱਲਾਂ ਅਤੇ ਬੇਲ ਪੱਤਰ ਆਦਿ ਚੜ੍ਹਾ ਕੇ ਆਪਣੀ ਅਥਾਹ ਸ਼ਰਧਾ ਦਾ ਪ੍ਰਗਟਾਵਾ ਕੀਤਾ ਗਿਆ। ਇਸ ਖਾਸ ਦਿਹਾੜੇ ‘ਤੇ ਹਰਿਦੁਆਰ ਤੋਂ ਵਿਸ਼ੇਸ਼ ਤੌਰ ‘ਤੇ ਪਦ ਯਾਤਰਾ ਕਰਕੇ ਆਏ ਕਾਵੜੀਆਂ ਦੁਆਰਾ ਲਿਆਂਦਾ ਗਿਆ ਪਵਿੱਤਰ ਗੰਗਾ ਜਲ ਸ਼ਿਵਲਿੰਗ ’ਤੇ ਅਰਪਿਤ ਕੀਤਾ ਗਿਆ। ਮਹਾਂ ਸ਼ਿਵਰਾਤਰੀ ਦੇ ਸਬੰਧ ਵਿੱਚ ਸਾਰੇ ਮੰਦਰਾਂ ਨੂੰ ਬਹੁਤ ਹੀ ਸੁੰਦਰ ਅਤੇ ਆਕਰਸ਼ਕ ਢੰਗ ਨਾਲ ਰੰਗ-ਬਿਰੰਗੀਆਂ ਲਾਈਟਾਂ ਤੇ ਫੁੱਲਾਂ ਨਾਲ ਸਜਾਇਆ ਗਿਆ ਸੀ ਅਤੇ ਪੂਰਾ ਸ਼ਹਿਰੀ ਖੇਤਰ ‘ਹਰ ਹਰ ਮਹਾਦੇਵ’ ਅਤੇ ‘ਬਮ ਬਮ ਭੋਲੇ’ ਦੇ ਜੈਕਾਰਿਆਂ ਨਾਲ ਲਗਾਤਾਰ ਗੂੰਜਦਾ ਰਿਹਾ। ਵੱਖ-ਵੱਖ ਮੰਦਰ ਪ੍ਰਬੰਧਕ ਕਮੇਟੀਆਂ ਵੱਲੋਂ ਦੂਰ-ਦੁਰਾਡੇ ਦੇ ਪਿੰਡਾਂ ਅਤੇ ਸ਼ਹਿਰਾਂ ਤੋਂ ਪਹੁੰਚੇ ਭਗਤ ਜਨਾਂ ਦੀ ਸੇਵਾ ਲਈ ਵੱਖ-ਵੱਖ ਪ੍ਰਕਾਰ ਦੇ ਅਤੁਲ ਲੰਗਰ ਲਗਾਏ ਗਏ, ਜਿਨ੍ਹਾਂ ਵਿੱਚ ਮਾਲ ਪੂੜੇ, ਪੂਰੀ ਛੋਲੇ, ਖੀਰ ਅਤੇ ਹੋਰ ਸੁਆਦੀ ਪਕਵਾਨ ਵਰਤਾਏ ਗਏ। ਮੰਦਰ ਪ੍ਰਬੰਧਕ ਕਮੇਟੀ ਦੇ ਉੱਘੇ ਮੈਂਬਰਾਂ ਦੀਪਕ ਕੁਮਾਰ ਮਿੱਤਲ ਅਤੇ ਚਰਨੀ ਸਿੰਗਲਾ ਨੇ ਪੱਤਰਕਾਰਾਂ ਨਾਲ ਜਾਣਕਾਰੀ ਸਾਂਝੀ ਕਰਦਿਆਂ ਦੱਸਿਆ ਕਿ ਭਦੌੜ ਸ਼ਹਿਰ ਵਿੱਚ ਸਥਿਤ ਇਨ੍ਹਾਂ ਪੁਰਾਤਨ ਸ਼ਿਵ ਮੰਦਰਾਂ ਦੀ ਭਾਰਤ ਦੇ ਵੱਖ-ਵੱਖ ਰਾਜਾਂ ਸਮੇਤ ਵਿਦੇਸ਼ਾਂ ਵਿੱਚ ਬੈਠੇ ਪੰਜਾਬੀਆਂ ਵਿੱਚ ਵੀ ਵਿਸ਼ੇਸ਼ ਅਤੇ ਗਹਿਰੀ ਮਾਨਤਾ ਹੈ। ਉਨ੍ਹਾਂ ਦੱਸਿਆ ਕਿ ਪੂਰੇ ਭਾਰਤ ਵਰਸ਼ ਵਿੱਚ ਗਿਆਰਾਂ ਰੁਦਰ ਮੰਦਰਾਂ ਵਿੱਚੋਂ ਸਿਰਫ਼ ਤਿੰਨ ਹੀ ਵਿਸ਼ੇਸ਼ ਮੰਦਰ ਹੋਣ ਦੀ ਪੁਰਾਤਨ ਮਾਨਤਾ ਹੈ, ਜਿਨ੍ਹਾਂ ਵਿੱਚੋਂ ਦੋ ਪਵਿੱਤਰ ਗਿਆਰਾਂ ਰੁਦਰ ਸ਼ਿਵ ਮੰਦਰ ਇਕੱਲੇ ਭਦੌੜ ਸ਼ਹਿਰ ਵਿਖੇ ਹੀ ਸਥਿਤ ਹਨ। ਇਨ੍ਹਾਂ ਇਤਿਹਾਸਕ ਮੰਦਰਾਂ ਵਿੱਚੋਂ ਇੱਕ ੧੧ ਰੁਦਰ ਸ਼ਿਵ ਮੰਦਰ ਪੱਥਰਾਂ ਵਾਲੀ ਅਤੇ ਦੂਜਾ ੧੧ ਰੁਦਰ ਸ਼ਿਵ ਮੰਦਰ ਬਾਗਵਾਲਾ ਵਿਖੇ ਸਥਿਤ ਹੈ, ਜੋ ਆਪਣੇ ਆਪ ਵਿੱਚ ਇੱਕ ਬਹੁਤ ਹੀ ਅਦਭੁਤ ਅਤੇ ਧਾਰਮਿਕ ਮਹੱਤਵ ਵਾਲੀ ਗੱਲ ਹੈ। ਇਲਾਕੇ ਦੇ ਬਜ਼ੁਰਗਾਂ ਅਨੁਸਾਰ ਇਨ੍ਹਾਂ ਪੁਰਾਤਨ ਮੰਦਰਾਂ ਦੀ ਉਸਾਰੀ ਪੁਰਾਣੇ ਸਮਿਆਂ ਦੇ ਰਾਜਿਆਂ, ਮਹਾਰਾਜਿਆਂ, ਰਿਆਸਤਦਾਰਾਂ ਅਤੇ ਤਕੜੇ ਘਰਾਣਿਆਂ ਵੱਲੋਂ ਆਪਣੀਆਂ ਸੁੱਖਾਂ ਤੇ ਮਨੋਕਾਮਨਾਵਾਂ ਪੂਰੀਆਂ ਹੋਣ ਦੀ ਖੁਸ਼ੀ ਵਿੱਚ ਕਰਵਾਈ ਗਈ ਸੀ।

ਇਨ੍ਹਾਂ ਪਵਿੱਤਰ ਧਾਰਮਿਕ ਅਸਥਾਨਾਂ ਨਾਲ ਲੋਕਾਂ ਦੀ ਅਥਾਹ ਆਸਥਾ ਅਤੇ ਵਿਸ਼ਵਾਸ ਜੁੜਿਆ ਹੋਇਆ ਹੈ। ਸ਼ਰਧਾਲੂਆਂ ਦਾ ਦ੍ਰਿੜ੍ਹ ਵਿਸ਼ਵਾਸ ਹੈ ਕਿ ਜੋ ਵੀ ਵਿਅਕਤੀ ਇੱਥੇ ਸੱਚੇ ਦਿਲ, ਸ਼ਰਧਾ ਅਤੇ ਸਾਫ਼ ਨੀਅਤ ਨਾਲ ਭਗਵਾਨ ਭੋਲੇਨਾਥ ਅੱਗੇ ਅਰਦਾਸ ਕਰਦਾ ਹੈ, ਉਸ ਦੀ ਹਰ ਮਨੋਕਾਮਨਾ ਅਤੇ ਇੱਛਾ ਜ਼ਰੂਰ ਪੂਰੀ ਹੁੰਦੀ ਹੈ। ਇਸੇ ਅਥਾਹ ਆਸਥਾ ਦੇ ਚੱਲਦਿਆਂ ਇੱਥੇ ਸਾਲ ਵਿੱਚ ਦੋ ਵਾਰ ਸ਼ਿਵਰਾਤਰੀ ਦੇ ਮੌਕੇ ‘ਤੇ ਬਹੁਤ ਹੀ ਵਿਸ਼ੇਸ਼ ਅਤੇ ਭਾਰੀ ਸਮਾਗਮ ਕਰਵਾਏ ਜਾਂਦੇ ਹਨ, ਜਦਕਿ ਹਰ ਮਹੀਨੇ ਆਉਂਦੀ ਤਰੋਦਸੀ ‘ਤੇ ਵੀ ਵਿਸ਼ੇਸ਼ ਮੇਲਾ ਭਰਦਾ ਹੈ। ਇਸ ਵਾਰ ਵੀ ਮਹਾਂ ਸ਼ਿਵਰਾਤਰੀ ਦੇ ਅਵਸਰ ‘ਤੇ ਭਦੌੜ ਦੇ ਇਨ੍ਹਾਂ ਪੁਰਾਤਨ ਮੰਦਰਾਂ ਵਿੱਚ ਦੇਰ ਸ਼ਾਮ ਤੱਕ ਭਗਤਾਂ ਦੀ ਆਮਦ ਨਿਰੰਤਰ ਜਾਰੀ ਰਹੀ ਅਤੇ ਪੂਰਾ ਸ਼ਹਿਰ ਭਗਵਾਨ ਸ਼ਿਵ ਦੀ ਅਰਾਧਨਾ ਅਤੇ ਭਗਤੀ ਦੇ ਰੰਗ ਵਿੱਚ ਪੂਰੀ ਤਰ੍ਹਾਂ ਰੰਗਿਆ ਹੋਇਆ ਨਜ਼ਰ ਆਇਆ।

ਹੋਰ ਤਾਜ਼ਾ ਖਬਰਾਂ ਲਈ ਕਲਿੱਕ ਕਰੋ। ਖੁੱਲ੍ਹੀਆਂ ਅੱਖਾਂ ਪਿੰਡ ਕੁਰੜ ਵਿਖੇ ਦੂਸਰਾ ਕਬੱਡੀ ਖੇਡ ਮੇਲਾ ਧੂਮ-ਧਾਮ ਨਾਲ ਸੰਪੰਨ, 55 ਕਿਲੋ ਵਰਗ ‘ਚ ਹਰਿਆਣਾ ਅਤੇ 35 ਕਿਲੋ ਵਰਗ ‘ਚ ਗਿਰਜੇਵਾਲ ਦੀ ਟੀਮ ਨੇ ਮਾਰੀ ਬਾਜ਼ੀ