216 ਕਿਲੋਮੀਟਰ ਦੀ ਰਫ਼ਤਾਰ ਵਾਲੇ ਵਿਨਾਸ਼ਕਾਰੀ ਚੱਕਰਵਾਤੀ ਤੂਫ਼ਾਨ ਡਾਲਫਿਨ ਦੀ ਦਸਤਕ; ਦੋ ਦੇਸ਼ਾਂ ‘ਚ ਹਾਈ ਅਲਰਟ ਤੇ ਐਮਰਜੈਂਸੀ ਜਾਰੀ

ਕੇਂਦਰੀ ਬਿਊਰੋ

           ਪ੍ਰਸ਼ਾਂਤ ਮਹਾਸਾਗਰ ਵਿੱਚ ਉੱਠੇ ਬੇਹੱਦ ਸ਼ਕਤੀਸ਼ਾਲੀ ਅਤੇ ਵਿਨਾਸ਼ਕਾਰੀ ਚੱਕਰਵਾਤੀ ਤੂਫ਼ਾਨ ‘ਡਾਲਫਿਨ’ ਨੇ ਜਾਪਾਨ ਅਤੇ ਚੀਨ ਵਿੱਚ ਭਾਰੀ ਤਬਾਹੀ ਦਾ ਖ਼ਤਰਾ ਪੈਦਾ ਕਰ ਦਿੱਤਾ ਹੈ, ਜਿਸ ਦੇ ਮੱਦੇਨਜ਼ਰ ਦੋਵਾਂ ਦੇਸ਼ਾਂ ਵਿੱਚ ਹਾਈ ਅਲਰਟ ਅਤੇ ਐਮਰਜੈਂਸੀ ਦਾ ਐਲਾਨ ਕਰ ਦਿੱਤਾ ਗਿਆ ਹੈ। ਜਾਪਾਨ ਵਿੱਚ ਪਿਛਲੇ ਕੁਝ ਮਹੀਨਿਆਂ ਤੋਂ ਲਗਾਤਾਰ ਆ ਰਹੇ ਜ਼ਬਰਦਸਤ ਭੂਚਾਲ ਦੇ ਝਟਕਿਆਂ ਅਤੇ ਸੁਨਾਮੀ ਦੇ ਖ਼ਤਰੇ ਤੋਂ ਬਾਅਦ ਹੁਣ ਇਸ ਨਵੀਂ ਕੁਦਰਤੀ ਆਫ਼ਤ ਨੇ ਸਾਲ 2011 ਦੀ ਤ੍ਰਾਸਦੀ ਦੀਆਂ ਦਰਦਨਾਕ ਯਾਦਾਂ ਤਾਜ਼ਾ ਕਰ ਦਿੱਤੀਆਂ ਹਨ। ਜਾਪਾਨ ਮੌਸਮ ਵਿਭਾਗ ਅਨੁਸਾਰ ਇਹ ਤੂਫ਼ਾਨ ਓਕੀਨਾਵਾ ਦੇ ਕੂਮੇ ਟਾਪੂ ਉੱਪਰ ਕੇਂਦਰਿਤ ਹੈ ਅਤੇ ਇੱਥੇ 144 ਕਿਲੋਮੀਟਰ ਪ੍ਰਤੀ ਘੰਟੇ ਦੀ ਰਫ਼ਤਾਰ ਨਾਲ ਚੱਲ ਰਹੀਆਂ ਹਵਾਵਾਂ ਤੇ 200 ਕਿਲੋਮੀਟਰ ਤੱਕ ਦੇ ਤੇਜ਼ ਝੋਕਿਆਂ ਨੇ ਜਨ-ਜੀਵਨ ਬੁਰੀ ਤਰ੍ਹਾਂ ਅਸਤ-ਵਿਅਸਤ ਕਰ ਦਿੱਤਾ ਹੈ। ਤੂਫ਼ਾਨ ਦੇ ਪ੍ਰਭਾਵ ਨਾਲ ਓਕੀਨਾਵਾ ਅਤੇ ਕਾਗੋਸ਼ਿਮਾ ਖੇਤਰਾਂ ਵਿੱਚ 14 ਹਜ਼ਾਰ ਤੋਂ ਵੱਧ ਘਰਾਂ ਦੀ ਬਿਜਲੀ ਗੁੱਲ ਹੋ ਗਈ ਹੈ। ਸੁਰੱਖਿਆ ਦੇ ਮੱਦੇਨਜ਼ਰ ਪ੍ਰਸ਼ਾਸਨ ਨੇ ڈھਾਈ ਲੱਖ ਤੋਂ ਵੱਧ ਲੋਕਾਂ ਨੂੰ ਸੁਰੱਖਿਅਤ ਸਥਾਨਾਂ ‘ਤੇ ਪਹੁੰਚਾਇਆ ਹੈ ਅਤੇ 500 ਤੋਂ ਵੱਧ ਉਡਾਣਾਂ ਰੱਦ ਕਰ ਦਿੱਤੀਆਂ ਹਨ, ਜਦਕਿ ਮਸ਼ਹੂਰ ਕਾਰ ਨਿਰਮਾਤਾ ਕੰਪਨੀ ਟੋਯੋਟਾ ਨੇ ਆਪਣੀਆਂ 9 ਫੈਕਟਰੀਆਂ ਵਿੱਚ ਉਤਪਾਦਨ ਅਸਥਾਈ ਤੌਰ ‘ਤੇ ਬੰਦ ਕਰ ਦਿੱਤਾ ਹੈ। ਇਹ ਤੂਫ਼ਾਨ ਜਾਪਾਨ ਨੂੰ ਪਾਰ ਕਰਕੇ ਪੂਰਬੀ ਚੀਨ ਸਾਗਰ ਰਾਹੀਂ ਚੀਨ ਦੇ ਪੂਰਬੀ ਤੱਟ ਵੱਲ ਵਧ ਰਿਹਾ ਹੈ, ਜਿੱਥੇ 216 ਕਿਲੋਮੀਟਰ ਪ੍ਰਤੀ ਘੰਟੇ ਦੀ ਰਫ਼ਤਾਰ ਨਾਲ ਹਵਾ ਦੇ ਝੋਕੇ ਲੱਗਣ ਅਤੇ ਸਮੁੰਦਰ ਵਿੱਚ 16.5 ਮੀਟਰ ਤੱਕ ਉੱਚੀਆਂ ਖ਼ਤਰਨਾਕ ਲਹਿਰਾਂ ਉੱਠਣ ਦੀ ਚੇਤਾਵਨੀ ਦਿੱਤੀ ਗਈ ਹੈ। ਚੀਨ ਦੀ ਸਰਕਾਰ ਨੇ ਝੇਜਿਆਂਗ ਅਤੇ ਫੁਜਿਆਨ ਸਮੇਤ ਕਈ ਵੱਡੇ ਸ਼ਹਿਰਾਂ ਵਿੱਚ ਹਾਈ ਅਲਰਟ ਲਾਗੂ ਕਰਦਿਆਂ ਸਾਰੇ ਸਮੁੰਦਰੀ ਬੰਦਰਗਾਹਾਂ ਅਤੇ ਜਹਾਜ਼ੀ ਰੂਟ ਬੰਦ ਕਰ ਦਿੱਤੇ ਹਨ। ਇਸ ਖ਼ਤਰਨਾਕ ਤੂਫ਼ਾਨ ਦੀ ਨਿਗਰਾਨੀ ਲਈ ਆਰਟੀਫਿਸ਼ਲ ਇੰਟੈਲੀਜੈਂਸ ਅਤੇ ਡਰੋਨ ਤਕਨਾਲੋਜੀ ਦੀ ਮਦਦ ਲਈ ਜਾ ਰਹੀ ਹੈ। ਵਿਸ਼ਵ ਮੌਸਮ ਵਿਗਿਆਨ ਸੰਗਠਨ ਦੇ ਨਿਯਮਾਂ ਅਨੁਸਾਰ ਇਸ ਤੂਫ਼ਾਨ ਨੂੰ ‘ਡਾਲਫਿਨ’ ਨਾਮ ਹਾਂਗਕਾਂਗ ਨੇ ਚੀਨੀ ਚਿੱਟੀ ਡਾਲਫਿਨ ਦੇ ਨਾਮ ‘ਤੇ ਦਿੱਤਾ ਹੈ, ਜੋ ਕਿ ਇਸ ਖੇਤਰ ਵਿੱਚ ਚੌਥੀ ਵਾਰ ਵਰਤਿਆ ਗਿਆ ਹੈ। ਮੌਸਮ ਵਿਗਿਆਨੀਆਂ ਨੇ ਚੇਤਾਵਨੀ ਦਿੱਤੀ ਹੈ ਕਿ ਇਸ ਸ਼ਕਤੀਸ਼ਾਲੀ ਚੱਕਰਵਾਤ ਦੇ ਪ੍ਰਭਾਵ ਨਾਲ ਬੰਗਾਲ ਦੀ ਖਾੜੀ ਵਿੱਚ ਘੱਟ ਦਬਾਅ ਵਾਲੇ ਖੇਤਰ ਕਮਜ਼ੋਰ ਹੋ ਸਕਦੇ ਹਨ, ਜਿਸ ਦਾ ਸਿੱਧਾ ਅਸਰ ਭਾਰਤੀ ਮਾਨਸੂਨ ‘ਤੇ ਵੀ ਪਵੇਗਾ ਅਤੇ ਦੇਸ਼ ਦੇ ਕੁਝ ਸੂਬਿਆਂ ਵਿੱਚ ਮੀਂਹ ਦੀ ਗਤੀਵਿਧੀ ਕਾਫ਼ੀ ਘਟ ਸਕਦੀ ਹੈ।

ਹੋਰ ਤਾਜ਼ਾ ਖਬਰਾਂ ਲਈ ਕਲਿੱਕ ਕਰੋ। ਖੁੱਲ੍ਹੀਆਂ ਅੱਖਾਂ