ਡਿਜੀਟਲ ਦੁਨੀਆ ਦਾ ਕਾਲਾ ਸੱਚ: ਇੱਕ ਸਾਲ ਵਿੱਚ ਇੱਕਵੀਂ ਦੇਸ਼ਾਂ ਦੇ ਦੋ ਕਰੋੜ ਬੱਚੇ ਆਨਲਾਈਨ ਜਿਨਸੀ ਸ਼ੋਸ਼ਣ ਦਾ ਸ਼ਿਕਾਰ

ਬਰਨਾਲਾ ਬਿਊਰੋ

          ਅੱਜ ਦੀ ਡਿਜੀਟਲ ਦੁਨੀਆ ਨੇ ਜਿੱਥੇ ਇਨਸਾਨਾਂ ਨੂੰ ਇੱਕ-ਦੂਜੇ ਦੇ ਨੇੜੇ ਲਿਆਂਦਾ ਹੈ, ਉੱਥੇ ਹੀ ਇਹ ਤਕਨੀਕ ਸਾਡੇ ਸਭ ਤੋਂ ਸੁਰੱਖਿਅਤ ਭਵਿੱਖ ਯਾਨੀ ਮਾਸੂਮ ਬੱਚਿਆਂ ਲਈ ਇੱਕ ਭਿਆਨਕ ਅਤੇ ਅਦ੍ਰਿਸ਼ ਜਾਲ ਬਣਦੀ ਜਾ ਰਹੀ ਹੈ। ਸੰਯੁਕਤ ਰਾਸ਼ਟਰ ਦੀ ਬਾਲ ਸੰਸਥਾ ਯੂਨੀਸੈਫ ਵੱਲੋਂ ਜਾਰੀ ਕੀਤੀ ਗਈ ਇੱਕ ਬਹੁਤ ਹੀ ਚਿੰਤਾਜਨਕ ਅਤੇ ਅੱਖਾਂ ਖੋਲ੍ਹਣ ਵਾਲੀ ਰਿਪੋਰਟ ਨੇ ਵਿਸ਼ਵ ਪੱਧਰ ‘ਤੇ ਹਲਚਲ ਮਚਾ ਦਿੱਤੀ ਹੈ। ਇਸ ਰਿਪੋਰਟ ਅਨੁਸਾਰ ਅਫ਼ਰੀਕਾ, ਏਸ਼ੀਆ, ਲਾਤੀਨੀ ਅਮਰੀਕਾ ਅਤੇ ਪੂਰਬੀ ਯੂਰਪ ਦੇ ਇੱਕਵੀਂ ਦੇਸ਼ਾਂ ਵਿੱਚ ਇੰਟਰਨੈੱਟ ਦੀ ਵਰਤੋਂ ਕਰਨ ਵਾਲੇ ਲਗਭਗ ਦੋ ਕਰੋੜ ਬੱਚੇ ਇੱਕ ਸਾਲ ਦੇ ਅੰਦਰ ਡਿਜੀਟਲ ਮੰਚਾਂ ‘ਤੇ ਜਿਨਸੀ ਪ੍ਰੇਸ਼ਾਨੀ ਅਤੇ ਸ਼ੋਸ਼ਣ ਦਾ ਸ਼ਿਕਾਰ ਹੋਏ ਹਨ। ਇਹ ਅੰਕੜਾ ਸਿਰਫ਼ ਇੱਕ ਗਿਣਤੀ ਨਹੀਂ ਹੈ, ਸਗੋਂ ਉਨ੍ਹਾਂ ਅਣਗਿਣਤ ਮਾਸੂਮਾਂ ਦੀ ਖਾਮੋਸ਼ ਚੀਕ ਹੈ ਜੋ ਇਸ ਡਿਜੀਟਲ ਹਨੇਰੇ ਵਿੱਚ ਦਮ ਘੁੱਟ ਰਹੇ ਹਨ। ਇੱਕਵੀਂ ਹਜ਼ਾਰ ਬੱਚਿਆਂ ‘ਤੇ ਕੀਤੇ ਗਏ ਇਸ ਵਿਸ਼ਾਲ ਸਰਵੇਖਣ ਅਨੁਸਾਰ ਬਾਰ੍ਹਾਂ ਤੋਂ ਸਤਾਰ੍ਹਾਂ ਸਾਲ ਦੀ ਉਮਰ ਦੇ ਹਰ ਪੰਜ ਵਿੱਚੋਂ ਇੱਕ ਤੋਂ ਵੱਧ ਬੱਚੇ ਨੇ ਆਨਲਾਈਨ ਸੈਕਸ ਸ਼ੋਸ਼ਣ ਦਾ ਸਾਹਮਣਾ ਕੀਤਾ ਹੈ। ਇਸ ਵਿੱਚ ਲਗਭਗ ਡੇਢ ਕਰੋੜ ਬੱਚਿਆਂ ਨੂੰ ਅਣਚਾਹੀ ਅਸ਼ਲੀਲ ਸਮੱਗਰੀ ਦਾ ਸਾਹਮਣਾ ਕਰਨਾ ਪਿਆ, ਨੱਬੇ ਲੱਖ ਬੱਚਿਆਂ ਨੂੰ ਅਸ਼ਲੀਲ ਗੱਲਾਂ ਜਾਂ ਤਸਵੀਰਾਂ ਸਾਂਝੀਆਂ ਕਰਨ ਲਈ ਮਜਬੂਰ ਕੀਤਾ ਗਿਆ ਅਤੇ ਚਾਲੀ ਲੱਖ ਬੱਚਿਆਂ ਦੀਆਂ ਨਿੱਜੀ ਤਸਵੀਰਾਂ ਉਨ੍ਹਾਂ ਦੀ ਸਹਿਮਤੀ ਤੋਂ ਬਿਨਾਂ ਫੈਲਾਈਆਂ ਗਈਆਂ। ਸਭ ਤੋਂ ਡਰਾਉਣੀ ਗੱਲ ਇਹ ਹੈ ਕਿ ਇਸ ਸ਼ੋਸ਼ਣ ਦਾ ਲਗਭਗ ਸੱਠ ਪ੍ਰਤੀਸ਼ਤ ਹਿੱਸਾ ਫੇਸਬੁੱਕ, ਵ੍ਹਟਸਐਪ, ਇੰਸਟਾਗ੍ਰਾਮ, ਸਨੈਪਚੈਟ ਅਤੇ ਟਿਕਟਾਕ ਜਿਹੇ ਲੋਕਪ੍ਰਿਯ ਸਮਾਜਿਕ ਮੀਡੀਆ ਮੰਚਾਂ ‘ਤੇ ਹੋਇਆ ਹੈ, ਜਦਕਿ ਚੌਦਾਂ ਪ੍ਰਤੀਸ਼ਤ ਮਾਮਲੇ ਆਨਲਾਈਨ ਖੇਡਾਂ ਦੌਰਾਨ ਸਾਹਮਣੇ ਆਏ ਹਨ। ਰਿਪੋਰਟ ਮੁਤਾਬਕ ਅੱਧੇ ਤੋਂ ਵੱਧ ਮਾਮਲਿਆਂ ਵਿੱਚ ਅਪਰਾਧੀ ਪੀੜਤ ਬੱਚੇ ਦਾ ਕੋਈ ਜਾਣਕਾਰ, ਦੋਸਤ ਜਾਂ ਰਿਸ਼ਤੇਦਾਰ ਹੀ ਸੀ। ਮੌਜੂਦਾ ਸਮੇਂ ਵਿੱਚ ਕ੍ਰਿਤਰਿਮ ਬੁੱਧੀ ਯਾਨੀ ਏ.ਆਈ. ਦੀ ਵਰਤੋਂ ਨਾਲ ਬੱਚਿਆਂ ਦੀਆਂ ਬਣਾਵਟੀ ਅਸ਼ਲੀਲ ਤਸਵੀਰਾਂ ਬਣਾ ਕੇ ਬਲੈਕਮੇਲ ਕਰਨ ਦੇ ਮਾਮਲੇ ਵੀ ਤੇਜ਼ੀ ਨਾਲ ਵਧ ਰਹੇ ਹਨ, ਜਿਸ ਨਾਲ ਲਗਭਗ ਗਿਆਰਾਂ ਲੱਖ ਬੱਚੇ ਮਾਨਸਿਕ ਪੀੜਾ ਝੱਲ ਰਹੇ ਹਨ। ਇਸ ਤਕਨੀਕੀ ਸ਼ੋਸ਼ਣ ਕਾਰਨ ਬੱਚਿਆਂ ਵਿੱਚ ਆਤਮਹੱਤਿਆ ਦੇ ਵਿਚਾਰ ਆਉਣ ਦੀ ਸੰਭਾਵਨਾ ਆਮ ਬੱਚਿਆਂ ਨਾਲੋਂ ਚਾਰ ਗੁਣਾ ਵੱਧ ਦੇਖੀ ਗਈ ਹੈ। ਸਮਾਜਿਕ ਡਰ ਅਤੇ ਝਿਜਕ ਕਾਰਨ ਇੱਕ ਪ੍ਰਤੀਸ਼ਤ ਤੋਂ ਵੀ ਘੱਟ ਮਾਮਲਿਆਂ ਦੀ ਸ਼ਿਕਾਇਤ ਪੁਲਿਸ ਜਾਂ ਹੈਲਪਲਾਈਨ ‘ਤੇ ਕੀਤੀ ਜਾਂਦੀ ਹੈ। ਯੂਨੀਸੈਫ ਨੇ ਵਿਸ਼ਵ ਭਰ ਦੀਆਂ ਸਰਕਾਰਾਂ ਅਤੇ ਤਕਨੀਕੀ ਕੰਪਨੀਆਂ ਨੂੰ ਸੁਰੱਖਿਆ ਨਿਯਮ ਸਖ਼ਤ ਕਰਨ ਅਤੇ ਏ.ਆਈ. ਨਾਲ ਜੁੜੇ ਅਪਰਾਧਾਂ ਵਿਰੁੱਧ ਕਾਨੂੰਨ ਬਣਾਉਣ ਦੀ ਅਪੀਲ ਕੀਤੀ ਹੈ।

ਹੋਰ ਤਾਜ਼ਾ ਖਬਰਾਂ ਲਈ ਕਲਿੱਕ ਕਰੋ। ਖੁੱਲ੍ਹੀਆਂ ਅੱਖਾਂ ਸ੍ਰੀ ਅਨੰਦਪੁਰ ਸਾਹਿਬ ਲਈ ਵਿਸ਼ਾਲ ਚੇਤਨਾ ਮਾਰਚ ਰਵਾਨਾ: ਵੱਖ-ਵੱਖ ਪੜਾਵਾਂ ‘ਤੇ ਲਗਾਏ ਲੰਗਰ